苟芸慧唔急造人享受畀老公吹

苟芸慧透露最近茹素，但並非為生BB作準備。

苟芸慧（苟姑娘）昨日以低胸長裙出席「Dyson Air-Styling美髮科學體驗」活動，即場幫女觀眾打造新髮型。問到平時可有幫老公陸漢洋Set頭？她說：「佢幫我多啲，佢好鍾意幫人吹頭！佢見髮型師用兩個風筒幫我吹頭好型，所以喺屋企都會咁幫我吹頭。（佢吹得成功？）幾成功，令我有Surprise。」

苟姑娘又透露最近報讀法式甜品班，為期一年並已上堂兩個月，兩星期後就有中期試。問到可有整甜品冧老公？她說：「有(0架)！佢都好畀面食晒，仲讚好食！我都有整畀女仔朋友食，等佢哋食完開心吓。（自創甜品？）有嘗試，改咗少少，但效果好似唔理想，要用心學好。（搵老公做白老鼠？）有呀！佢係一個好開心嘅白老鼠。」

轉食素改善健康

問到平時可有下廚？她即讚老公比較叻：「我做助手幫佢，但我呢排食素，都係烚菜。（點解突然食素？）想身體健康啲，同埋呢排氣氛唔好。」講到上堂忙碌可有時間「造人」？她說：「冇呢個計劃，應該兩、三年後。」

苟芸慧有老公幫佢吹頭，恨死隔籬！

苟芸慧即場幫女觀眾變「髮」。