黃妍閉關練歌斷六親
黃妍於下星期一（7日）舉行首個個人騷，昨日在土瓜灣錄音室綵排的她自爆早前喉嚨發炎，服藥後昏睡，因禍得福冇失眠：「之後應該會緊張，擔心練嘅嘢到時唱唔出，要執生。（驚發台瘟？）冇得驚，Enjoy過程，師兄陳柏宇都有畀啲Tips我，練到120%上台，到時就會打折扣變100%。（驚會爆喊？）擔心o架！但一喊唱歌就難聽，會努力控制情緒。」
嘉賓除了陳柏宇外，她預告會有多一位神秘嘉賓：「係男仔嚟，同佢夾歌爆出好多火花，其實仲有其他Surprise，有練到啲才藝表演，自己都好期待。」為了做好準備，黃妍早前「斷六親」住進酒店閉關：「冇人搵到我，朋友好好，驚阻住我冇搵我，媽咪就煲湯畀我飲，每日一起身就練歌，進度好快。」