李施嬅陳山聰有獎齊齊分
演員陳山聰與李施嬅昨日以懷舊造型宣傳主演劇，講到外間睇好奪「視帝」，山聰笑稱反而想攞「老飛躍」獎項，同時希望劇集成為「最佳劇集」，並指有朋友已心急提供續集的故事大綱！
無綫熱播劇《金宵大廈》演員陳山聰、李施嬅、譚凱琪（Zoie）及陸永等，昨日在將軍澳電視城宣傳，劇組為山聰及張彥博送上蛋糕補祝生日。對於劇集贏盡口碑，山聰與施嬅坦言很高興，並留意到網民有不少二次創作，大讚有創意。問到會否開拍續集？山聰笑說：「我有朋友寫咗個續集大綱畀我，不過開唔開拍就要交畀公司決定，同埋要睇施嬅嘅檔期。」施嬅說：「有興趣，好難得有一套劇，個個單元、角色都得觀眾鍾意，真係好奇幻，但唔係我哋可以決定，交番畀TVB高層同埋經理人公司。」
恨攞「最佳老飛躍」
山聰近日與好友慶祝生日，笑言是婚前派對，亦是他最後一個單身生日。提到獲睇好膺視帝、視后，山聰笑說：「我最想攞『最佳老飛躍』，楊明攞咗喇，應該到我啦！視帝仲有好長條路可以攞，真心最想攞『最佳劇集』。」施嬅亦指劇集成功不只是兩個人的事，同樣希望攞「最佳劇集」。
譚凱琪搵男友試床戲
近日劇情講到Zoie借「金丁」陸永性交轉運，陸永笑指獲Zoie稱讚很適合演此角，但現實中沒此艷福：「好彩老婆唔睇我做嘅戲，佢話喺屋企都見到，有乜好睇啫！」又表示最初擔心拍親熱戲，與Zoie商量如何借位：「我哋係好健康嘅床戲，教育電視仲多嘢睇！」Zoie自言其尺度比陸永高：「我唔係好似佢得個床頭櫃震，我表情都要震o架！我都有同男友講定，有時佢仲會同我一齊研究，批評我嘅演技，都有啲尷尬。」