陳山聰孭飛劇得米：冇佗衰家
陳山聰首次做「男一」的劇集《金宵大廈》近期熱播，更被網民封為年度劇，他笑稱總算沒有佗衰家。李施嬅讚他已經上了神枱，坐穩一線小生地位。
無綫劇集《金宵大廈》演員陳山聰、李施嬅、黃祥興與高海寧等昨日在將軍澳宣傳，劇集近期受到熱捧，首次擔正「男一」的陳山聰不負使命，笑說：「好開心，呢份係我今年最好嘅生日禮物，冇佗衰家，依家返到屋企，樓下看更都會話，你返嚟啦『阿蕭』，我話使唔使幫手頂更。（點報答觀眾？）我可以拍片返公司頂更看門口，朝早同珍姐、杜生講聲早晨。」李施嬅對他笑說：「你依家坐穩一線，上咗神枱o架啦！」山聰搞笑回應：「我綁緊條安全帶o架啦！」
𢱑定拍續集
兩人皆認為收視並不重要，最緊要吸引觀眾睇電視及談論，李施嬅說：「網上評論對套劇評分好高，有啲人話呢套係年度劇，所以唔使睇收視有幾多，我都覺得已經贏晒。」她雖然已離巢，但若原班人馬拍攝續集，也想參演。
黃祥興意外生三個
已是一對仔女父親的黃祥興近日再宣布太太有喜，懷有五個月身孕，他說：「已經有對仔女，所以今次唔想預先知道仔定女，仔女都咁開心。（有計劃定意外？）係意外嚟嘅，生埋呢個真係收工。（去做結紮？）以為安全o架嘛，真係要去用其他方法避免呢件事發生，哈哈！」他坦言養育三個小朋友有壓力，要努力工作，但也感到幸福：「不過啲退休計劃、買跑車就可能要延遲啦！」