郭富城父女檔舞唱神曲

城城使出招牌舞步，夠晒煞食。

近日城城獲邀將兒歌界神曲《Baby Shark》，加入其經典金曲《對你愛不完》及《唱這歌》的「指定動作」，改編成「郭富城版舞蹈」。他昨午現身尖沙咀與大批小朋友齊齊跳唱，吸引大批市民圍觀。城城提起囡囡即一副冧樣，自爆出門口時「大寶」（大女Chantelle）剛瞓醒，與他穿父女裝，低調地跟他到場，相當溫馨。

囡囡有音樂天分

談到開拓小朋友市場，城城直言有私心：「原來小朋友都有佢哋嘅神曲，呢首歌好吸引小朋友嘅眼球，大人都鍾意，囡囡扭計就會自己開電子產品嚟聽呢首歌，依家每次我跳，佢都錫同攬吓爸爸，又會同我一齊跳仲拍咗片。（公開片段？）以前我好抗拒，仲叫大家唔好兜口兜面影佢，依家覺得可以考慮，但等佢大啲先。（佢有呢方面潛質？）絕對係，佢依家上緊啲音樂班。」

講湊女經眉飛色舞的城城，話考慮公開囡囡萌樣。

已為人父的城城與小朋友跳唱兒歌。

陪老婆公園漫步

他再次表示婚後「擁有另一個世界」，11月才開拍高科技偵探新片的他，這段時間除做準備工夫外，又盡量抽時間陪伴家人，做好父親及丈夫責任：「大寶依家上N班，第一日送佢返學好感動，覺得佢都需要學習過群體生活，之前中秋節我帶晒成家人陪我去台灣開騷。我覺得要多啲帶小朋友出去玩，見識吓呢個世界。（影到你同太太深宵行公園。）講個秘密大家知，我好鍾意行公園，太太懷孕時我哋成日去，覺得好浪漫，公園環境同空氣都好啲，大家可以去嗰度撞吓我。」