蔡少芬生日宣布封肚
蔡少芬（Ada）前日46歲生日，適逢其所屬經理人公司的新辦公室開幕，同門藝人包括Ada老公張晉、朱茵、鄧麗欣（Stephy）、原子鏸丶歐倩怡及戚其義等齊齊為她送驚喜，大住肚的Ada神采飛揚，最溫馨當然是張晉送上一束46支玫瑰及粉紅蛋糕，還親手寫生日卡，逗得Ada四萬咁口，情不自禁送吻，羨煞旁人！
願望生個健康BB
問張晉可有送禮物？Ada說：「對上一次收禮物係聖誕節，當時佢送咗個手袋畀我，好感恩，我哋兩個都冇乜物質缺乏，買禮物都係為咗氹吓對方，佢仲話我今年都冇送生日禮物畀佢。」至於生日願望，她表示最緊要平平安安生個健康BB！又透露撇低兩位女兒楚兒及信兒，與張晉到酒店過二人世界。
叫朱茵再生多件
席上朱茵祝Ada再生多個，成為「多產」藝人，Ada即說：「啋過你！呢啲『多產』我唔要，工作嗰啲『多產』我就要！」之後又說：「同朱茵大家咁話，叫佢追多個先，Stephy就快啲結婚啦！我就夠喇，冇手再抱，我老公要留番一隻手攬我，所以我『封肚』，生埋呢個夠晒數。」
