超齡家長！陳慧珊老公湊女放學變阿公
正修讀教育系博士學位的藝人陳慧珊（Flora），對教育充滿使命感，最近與老公鍾家鴻（Mike）自資兼監製的節目《放學後》在香港開電視播出。兩人訪問多位嘉賓，包括吳鎮宇、胡杏兒及宣萱的教育背景，帶出除了家教、學教外，亦要終身自教及終身學習。
投資百萬講教育
Flora近八年重返港大學園修讀教育系，直言要為教育界作出貢獻：「我依家有三個身份，家長、學生、教育工作者，近期都有去唔同地方演講。（唔再拍劇？）我永遠都係藝人，只係個天叫我唔好做住，好幸運可以做演員、讀到書，依家希望將娛樂圈同教育嘅嘢Crossover。」
她與老公想以新包裝製作節目，並非一般的清談節目或真人騷，故不惜投資逾七位數字製作，Flora說：「難度係冇劇本，得我哋兩個做晒前期、後期，為每個受訪者度身訂造故事同拍法，相信觀眾一定喺若干部分搵到共鳴。」
阿女有育兒指引
與Mike的愛女快將12歲，Flora笑言兩人是超齡家長，認為教育下一代，每日都是挑戰：「我就快50歲，Mike試過湊女放學時被誤認做個女嘅公公，因為好多父母只係30幾歲，我個教授都係得30幾歲，以前有睇開我啲戲，你話幾誇張！但我哋有嘅係經驗，睇嘅嘢一定唔同。」問到與囡囡是否有代溝？他們說：「冇！個女會話畀我哋知想父母點教佢。佢鍾意哲學，而我哋都不停Update自己，始終科技方面佢哋學得好快。」