李亞男母女「鬧醒」王祖藍
藝人李亞男昨日出席活動時佩戴「I Love You」字樣的頸鏈，一臉甜蜜的表示是老公王祖藍所送：「佢成日都好Sweet，生咗之後都唔可以唔記得對方。（你有咩表示？）我比較生活上貼身啲，例如做人肉鬧鐘，每日用盡方法叫佢起身，搖佢錫佢，搵阿女叫佢，好多方法，依家有阿女喺度，佢醒得快啲。」她指現時9個月大的囡囡王天韻，是個又高又肥的「超級大BB」，聰明又識氹人，亞男直言會繼續生B：「生仔當然好，女都冇所謂。（生幾多個？）雙數，2、4、6、8可能生隊足球隊！」
同場還有嘉賓郭秀雲、Rosemary、貝安琪及腹大便便的名模伍靜麗等，郭秀雲說日前出海險些中暑：「同班海洋發燒友搞保護海洋生態活動，我着住潛水衣，裏面有打底，當日好熱，又企咗喺船頭成個幾鐘，之後覺得個心口寒一寒，似中暑，當時好想即刻跳落海降溫，但又唔得，惟有死撐，飲咗成加侖水解暑。」
