田蕊妮呻太長狠飛吳業坤
將於本周五開處女騷的田蕊妮（阿田），昨日到電台受訪時表示已進入緊張狀態，反指有份上台的爸爸心情輕鬆：「完咗Full Band綵排之後，佢問我Book間房同隊Band要幾錢，想當唱K咁！」又透露爸爸會處男獨唱：「佢知我有食清音丸，同我講開騷嗰日畀兩粒佢食，哈哈！真係好難得同爸爸製造同台回憶。」但坦言最驚淚灑舞台：「對住空氣綵排已經喊，最驚一喊就會喊爛把聲，又會表達唔到想講嘅嘢，都要好好控制吓。」
阿田自爆原先有邀請吳業坤做嘉賓，但因時間關係，做出人生「最沉重的決定」，她抵死說：「依家Cut咗佢，唔再需要佢！哈哈！個騷太長又唔係件好事，自己都唔好意思，但如果因為知道有佢做嘉賓而唔買飛嘅朋友，依家就可以買喇！」