Naomi夜蒲遭圍毆打甩牙骹
性感女星馮鎵瀠（Naomi）昨日凌晨在酒吧與男友人消遣時遇襲受傷，到灣仔律敦治醫院急症室求診。事緣昨日凌晨她在社交網問：「銅鑼灣依家有咩玩？」直至早上7時，她再留言「救命」，打卡位置是灣仔律敦治醫院急症室。
已報警處理
及至8時，她講述事發經過：「剛才於酒吧消遣時，有陌生人坐落我哋張枱。」並指男友人被人摸下體：「我哋禮貌地勸喻停止，然後離開。對方『吹雞』喺樓下的士站伏擊我哋。3個人先襲擊同行友人，打至眼鏡飛脫及受傷，被送上的士離開。我上前擋駕，有認識路過的朋友勸交時，有3人捉實我，我被打至四肢受傷流血及下顎移位，現已報警處理。」
Naomi昨日受訪時稱：「我下顎、膊頭、手掌、指甲同四肢都受傷，我朋友傷勢比我更嚴重！佢哋非禮完人，然後搵人喺樓下打傷我哋！大家幫忙要求酒吧，交出CCTV同提供打人者資料！」又指於醫院照了X光和腦掃描，現時待警方睇完驗傷報告交CID處理。
知道對方身份
她坦言男友人被非禮時，知道對方是甚麼人，當時已表明不要再摸，對方即離開酒吧：「佢仲喺(車立)口同我哋講拜拜，然後搵人伏擊我哋，打傷我朋友，眼鏡、帽、耳環都甩咗，面部同腹部受傷。我上前理論，對方嘅同伴動武推我落地打。」