李思捷陷中年危機恨結婚生仔
藝人李思捷睽違三年再有新劇推出，飾演廢中的他坦言現實中亦有中年危機，又對曾被稱為「溝女王」看得很開，揚言私生活冇需要向外界解釋，更自爆已有對象，想結婚組織家庭，亦希望生小朋友。
李思捷在《她。她。她的少女時代》中飾演曾坐牢的過氣當紅歌手，出獄後成為廢中，再重新振作的故事，他笑言：「高層覺得呢個角色好啱我，點解會諗起我？我用好正面去諗，呢個係好嘢，個角色經歷浮浮沉沉，真係中獎。」談到最難忘一幕，他要被數十人包圍掟雞蛋及菜：「如果真係畀幾十人咁掟，我死硬，因為係好危險，但多得攝影師、導演同動作指導，成件事拍出嚟好逼真，我又冇受傷，拍完所有人包括臨時演員都一齊拍手，呢個情景我入行咁多年冇見過，大家好有成功感。」
田蕊妮扑濕嗌痛
劇中他跟田蕊妮（阿田）有感情瓜葛，他大讚演出節奏非常合拍，不過有場卻發生小插曲，他慘中頭獎：「有場戲佢要用個道具袋打我，個袋入面放咗啲好軟嘅嘢，打落個頭係唔痛，但休息期間阿田飲完水，唔覺意將個鐵水樽放咗入個道具袋，拍攝時打落我個頭『呯』一聲，連音效都唔使配，我痛咗五分鐘。」
對於今次角色，思捷稱最大共鳴是中年危機：「會有好多擔心、胡思亂想，無論係生理上或者工作中都會諗好多嘢。」至於可曾跟角色一樣經歷低潮期，他坦言：「我都做過啲冇人識嘅角色，去到某個點會諗不如唔做，又試過個人彈得好高，成個人飄飄然，人哋捧到你好高，但家人唔敢同你講嘢，依家長大咗，調整番個價值觀。」
「鍾意我演出就成功」
面對負評又如何自處？曾被稱為「溝女王」的思捷看得很開：「你揸香港身份證，我又係揸香港身份證，點解你可以溝女，玩得咁開心，我溝女就唔得，咁好唔公平，而且呢樣唔係負面，係正面，因為你都做緊我做嘅嘢，你都做得好開心，點解唔畀我開心？我個責任係娛樂觀眾，導演嗌Cut、Good take我就搞掂，我返到屋企着條底褲周圍走、食支煙都唔關任何人事，係我私生活，冇需要解釋，我冇諗啲人點睇我，鍾意我嘅作品就成功。」
講到感情生活，思捷自言也想結婚建立家庭，亦已有對象：「結婚要好多嘢去配合、要睇Timing，否則變咗離婚，兩個人要好了解同生活過，我相信婚姻，我亦好鍾意小朋友，睇吓上天會唔會賜畀我。」
場地：桔梗