Aka嫌做「大姨媽」核突
組合Super Girls隊長趙慧珊（Aka）昨日出席活動，透露中秋節有假放，談到難忘的中秋節，是與父母、妹妹及其男友一起到沙灘，笑言：「去到鋪晒啲嘢之後，兩Pair人就走咗去，留我自己一個坐喺度睇住啲袋同望月光。（父母有冇催你拍拖？）冇喎，可能因為阿妹就嚟結婚，可以分散注意力。」她又謂寧願妹妹爬頭結婚：「如果唔係有排等，等到50歲。」
Aka指做家姐要送龍鳳鈪，亦有叫髮型師及化妝師幫妹妹，又陪她試婚紗。講到如果妹妹生了BB後就榮升「大姨媽」，她笑說：「好核突呀，叫番我個名就得！（催妹妹快啲生B？）佢生我玩，佢話都會畀我教，因為我之前教畫畫、跳舞，都知點樣同小朋友互動。」