吳浩康終肯認愛崔碧珈

擁36G的咪神崔碧珈疑抑鬱復發,早前與吳浩康(Deep)因瑣事拗撬竟激動嗌分手,不過經過幾天冷靜,昨日Deep終於公開認愛,表示會陪伴女友一同面對病魔,共度難關。

過往予人花弗印象的Deep,今年4月被爆與崔碧珈(Anita)撻着,當時二人並未認愛,但其實Deep早已被Anita降服,修心養性,只是二人有共識想戀情低調,直至早前Anita突五連發在社交網爆出關係「完了吧」,嚇了Deep一跳,事隔多天,昨日他終親口認戀情:「多謝大家關心,我同Anita其實年頭開始拍拖,認識大家到依家半年,好欣賞佢好專注工作,做嘢投入,無論嗰件事佢識定唔識,都會諗辦法解決,覺得呢個女仔好有諗法。」

已見家長

對於女友早前突然爆seed喊分手,Deep解釋當日原本高高興興買餸回家煮飯仔,期間發生拗撬,Anita一時情緒激動所致,她早年曾患抑鬱病,近日亦向Deep透露需要看醫生,疑情緒病復發,對此Deep直認:「佢有見醫生,都控制到,多謝關心,我哋會努力去面對,一齊度過。」他坦言已見家長,與崔媽媽更是經常見面,問到是否有計劃結婚?他說:「自己都係適婚年齡,開始一段關係當然係諗將來同想結婚,Anita係好女仔,所以我哋一齊嘅時候,協議咗重點係支持對方嘅工作,工作為先。(會唔會禁女友幕前性感?)關於佢嘅形象,我覺得因為係佢嘅工作,我應該要尊重同支持,喺埋一齊要互相支持。」雖然公開戀情,但他仍希望拍拖可以低調,並會努力工作。