黃智雯食殘廢餐對黎諾懿心動

無綫劇集《街坊財爺》演員黃智雯、黎諾懿、苑瓊丹、朱咪咪、郭少芸、許家傑等昨日在將軍澳電視城以嫦娥奔月搞笑造型預祝中秋。黎諾懿透露劇情將講到他與黃智雯撻着，朱咪咪即搞笑說：「梗係揀我呢啲年紀嘅女人好啦，驅風袪濕除頑痰，仲要壯腰補腎添！」大搞氣氛。

黃智雯透露其嫦娥造型花了兩個半小時化妝，原來她入行以來一直未有機會拍古裝，問到可想嘗試？她即說：「都想，自己想拍宮廷劇或者做俠女打吓。」她自覺穿起古裝後有一種淑女古典的感覺，笑稱考慮在台慶或頒獎禮以古裝亮相。

兒子兩秒整爛新燈籠

相反，黎諾懿提起古裝即耍手擰頭，因當年拍過不少古裝劇，而且要剃頭演出，他說：「之前剃過幾次頭，依家如果要再剃頭就唔好喇！年紀唔細，剃咗驚生唔番！」又指劇中與黃智雯有感情線：「我哋戲裏面係後現代嘅羅密歐與茱麗葉，拍到好浪漫。」黃智雯笑謂拍攝時相當sweet，有點心動：「有場戲講我對眼受傷，蒙住眼佢餵我食嘢，嗰一下都好感動，未有男仔咁樣對過我。」

此外，講到中秋節，二人皆表示會與家人食飯團圓，黎諾懿笑說：「尋日買咗個電燈籠畀個仔玩，唔夠兩秒已經畀佢整爛咗，所以唔夠膽教佢玩蠟燭，驚佢燒咗間屋。」