摑伍允龍10巴掌 Aka心痛手更痛
由歌手跳進大銀幕的組合Super Girls成員 Aka，於電影《潛行者》中飾演紋身師傅，故每次開工身上都印滿紋身圖案及以熱褲示人。現實中她未想過紋身：「怕嚇親媽咪，亦唔想好似有嘢侵入身體嘅感覺，或者等年紀大啲，遇到有紀念性嘅事再考慮。」
戲中她飾演伍允龍的女友，但親熱戲欠奉，只在她臨死時對方才錫了她額頭一下，她笑說：「我個銀幕初吻仲喺度，都想試吓。（八両金都制？）都好，哈哈。」面對片中三位型男伍允龍、吳建豪及安志杰，她笑言三個都鍾意，對於伍允龍被指木獨，她說：「佢幾得意，好純真，我唔鍾意太多花言巧語。」提到伍允龍拍攝時不慎被安志杰踢裂肋骨，她說：「佢堅持拍完先去醫院，之後又返嚟拍過，真係好勁。」她又爆戲中要摑伍允龍一巴：「因為要唔同角度咁拍，佢畀我打咗近十巴，打到我手又痛，個心又痛。」