蔡瀚億操肌「汗」都冇滴

演員蔡瀚億(BabyJohn)近年密密健身,希望擺脫瘦削形象,最近更獲健身中心垂青,邀拍網上宣傳片,他表示拍攝難度在於汗水:「我好少會滿頭大汗,平時即使負好重磅,做幾多個回合都滴『汗』不沾,所以今次要工作人員為我『加汗』。」

今次拍攝特別將健身房變成廚房,BabyJohn化身美男廚神煮健康菜式,他笑說:「平日喺屋企我負責洗碗嗰啲後期工作,今次第一次喺鏡頭前煮嘢食,事前都驚自己會成為地獄廚神!好彩原來有教練幫手,我喺旁邊幫手切吓嘢、整吓伴碟,所以係大成功。」