陳家樂激嬲導演遭粗口「掃射」
陳家樂與歌手岑日珈（Angie）相識於微時，相隔多年首度在靈異電影《綁靈》結片緣，原來兩人曾跟同一位老師學演戲，家樂笑說：「嗰陣係喜劇訓練，佢好怕醜咁做搞笑戲，大家都唔明佢演乜！之後再見番就係拍呢套戲，變咗肥妹仔又多嘢講，依家瘦番就變成少女中帶女人味。」男神一讚，Angie頓時暈大浪兼胡言亂語：「咁你鍾唔鍾意？（係咪向家樂示愛？）乘機囉！我平時好怕醜，佢紅咗好多，要黐佢人氣。」
出法寶清「污穢嘢」
今次到泰國拍鬼片，家樂自言性格大膽，問到可有帶平安符護身？他笑說：「有帶嘢喺身，就係迷你空氣清新機，真係用嚟清『污穢嘢』！」不過「護身符」竟令他捱鬧：「有次埋位唔記得除，拍完先發覺，所以要補拍番，搞到導演嬲到癲，喺一分鐘內爆咗80個粗口字，咁自己係抵鬧嘅。」
Angie則透露在酒店遇靈異事件，有晚隔壁傳來嘈雜聲，最恐怖是根本沒人入住：「驚到叫咗媽咪飛過嚟陪我！仲可以煲湯我飲。（請埋家樂飲？）嗰時我怕醜，又第一次合作，就算我對人有意思，人哋都未必有意思。」問到若票房好，可想開拍續集？她即表示好想，兼爆出內心想法：「最想可以同家樂演情侶囉！」看來Angie完全被男神迷倒。
