森美晒囝囝11科A*:I am拋鑊you!

鮮有公開談及家庭的森美,前晚出席活動時難掩興奮,宣布英國留學的囝囝在GCSE考獲11科A*佳績,他自爆贈上最高榮譽的一句說話「I am proud of you」,又抵死用成績「驗親」,「證實」囝囝是親生。

戴上「霸王」冷帽造型的森美、小儀受訪時大放笑彈,先有小儀大呻十年前已厭倦再跟森美做拍檔,後有森美投訴對方「勾佬」:「你勾金剛以為我唔知?好彩佢走得快!」然後他趁機報喜,指囝囝考獲11科A*(相等新評級制8-9的最高等級)成績:「佢喺香港成績麻麻,但喺英國有好好成績,做老竇好開心!(想佢讀完書留當地發展?)前途交畀佢自己諗,但作為父母都想佢返香港見多啲。」

呻冇「洋妞」做新抱

問到如何獎勵囝囝?森美即場用英文驕傲示範:「我讚佢『I am拋鑊you』(I am proud of you,我以你為榮),我好少講呢句!覺得佢好努力,供書教學值得。(佢聽到有咩反應?)好開心,佢都估唔到成績咁好。」續抵死講笑話曾懷疑囝囝不是親生:「以前都驚個仔唔係自己,依家佢咁叻就知係自己!」森美當年會考25分(1A5B2C),認真虎父無犬子!

上一秒先讚爆囝囝,但下一秒森美竟大數囝囝不是,大呻冇「洋妞」做新抱:「我都有叫佢識番個,但佢話外國人麻麻哋,供書教學呢樣唔抵!」小儀指住自己插嘴笑話:「因為Auntie我同佢灌輸香港女仔好!」森美神回:「咁叫佢跟你返清遠搵女朋友啦!」

講到小儀的好友金剛,近日突然傳跟女友分手,她聞言驚訝說前日才見二人甫Sweet爆相,要再打電話求證。而同場的阮兆祥表示籌備演唱會如火如荼,笑謂開騷日子是好日,因同期撞正另外3個歌手個唱:「撞咗蔡一傑、馬浚偉同台灣歌手陳綺貞,有4個選擇畀大家,去邊個冇所謂,聽場音樂會輕鬆吓!」