祖兒個唱超時煞科破3項紀錄

尾場觀眾High爆氣氛熾熱，祖兒高呼：「你哋嗌幾多，我就唱幾大力！今晚早啲開騷，晏啲收工，橫掂聽日唔使開工。」果然講到做到，唱至凌晨12時35分才結束，唱足4小時，連之前18場的超時罰款，保守估計超過百萬。

針灸針到頸都瘀晒

騷後祖兒受訪時笑言，唱到超時是一生最耐一次，最開心今次不用再食類固醇開聲，上次個唱不適最為慘烈，故不能讓自己重蹈覆轍。但最慘今次由5月病到8月，母親生日連生日歌也唱不到，要從南京請醫師來一早一晚針灸：「近鏡睇我條頸針到瘀晒，經調理後係好啲，加埋大家嘅力量給力，最終令自己完成呢個壯舉。」又許諾3年之內再開騷！

容祖兒在紅館唱足19場，破了個人最多場數紀錄。

祖兒肉緊攬攬張敬軒。

講到頭場舞台機關失靈，宣布「補場」的決定是否問准老闆楊受成？祖兒說：「老實講我唔敢自把自為，我喺台下其實已經崩潰咗，三條青筋出晒額頭上面，冇諗過有咁情況，以為用5、6分鐘搶救到啲機件問題，但原來係唔得，個騷複雜，連總綵排都排唔切。」

爆古天樂有紅館夢

過去19場嘉賓星光熠熠，全是她親自邀請，第一場請到張學友，她說：「好多我仰慕嘅巨星都好錫我，唔知我前世做咗咩好事，大家都咁錫我。」如何氹得古天樂做嘉賓唱《今期流行》？她說：「我覺得佢自己有個紅館夢，當然我同佢嘅友情，都超乎我想像，佢咁錫我，每年佢生日都邀請我，所以先大膽開口請佢，佢嗰日仲係病，點知上到台就龍精虎猛，衝去觀眾度狂握手，呢種係超脫表現。」

至於張敬軒做嘉賓之餘，每場更任調音師，又說想祖兒搵到一頭好人家，祖兒說：「佢好感性，話想我哋演唱會之前搵到一個打氣嘅人啦。（阿Sa踢爆你好多人追？）唉，其實邊度有啫……唔係冇，佢講多咗，報大數啫！（即係有？）咁一、兩個都有啩！（你4字頭啦？）你同我定，今次係第一次咁多男士（Fans）同我講I love you。」講到前度男友劉浩龍在IG爆粗鬧何韻詩，又上載一張掛「MY JOEY」車牌的相片，祖兒即說其他事沒有回應，總之錫她的人都有來捧場。