容羨媛教子女自理杜絕變「港童」
容羨媛經常帶一對子女四周遊玩，認為親子時光比物質上的喜悅更為寶貴：「玩樂方面，唔一定要使好多錢，帶佢哋去公園或者泳池，已經係一個好好嘅親子活動。我經常帶小朋友去親親大自然，有時去野餐坐低食吓嘢，同小朋友傾吓偈，已經好開心！」
現今不少家長過分溺愛子女，導致孩子依賴別人照顧，變成「港童」，但容羨媛決心不讓子女如此：「由細到大我唔太着重小朋友學習方面，反而覺得佢哋一定要做個有禮貌嘅人，同埋要有自理能力。由細個開始要培養，例如佢哋依家幼稚園放學返屋企，都會將鞋、衫、書包放回原位，呢啲微小習慣要佢哋自己做，如果你幫佢做晒，可能日積月累就成為今時今日所謂嘅港童，所以家長要盡量放手畀小朋友做。」
親子游水得着多
在培養子女興趣方面，她從不假手於人：「我好鍾意帶小朋友去游水，不過從來冇畀佢哋跟教練學，主要由我同先生教，阿女大概一歲幾，已經掟佢落水，由淨係識撥水到今時今日，佢已經唔需要任何幫助都識游，所以家長們有時間嘅話，自己教小朋友游水。」
育兒貼士
1.要放手，
讓小朋友自己嘗試。
2.多鼓勵及支持。
3.多陪伴，
與小朋友同試同做。