林慧倩呻冇運靠自己搵機會
前港姐林慧倩（Giselle）近期踩過界，由主持變身歌手，唱出女性要自強。入行多年的她，感嘆星途不順利，一直苦等「幸運星」幫助，但最終靠自己爭取機會。
專注做主持的Giselle，近年不斷挑戰自己，除轉戰銀幕，又推出新歌。入行多年的她，面對不同的負面聲音，曾一度迷失：「有陣時我會諗呢啲人畀嘅意見，係咪真係要我去接受？以前試過換形象，有啲人會叫我唔好咁樣做。我都好想有人可以幫到自己，但可能我唔係一個好幸運嘅人，之後會諗，與其咁多年喺度等，不如自己努力啲，所以近年無論工作、感情或者人際關係，唔會有唔開心嘅感覺。」
茁壯成長
對自己要求甚高的Giselle，指新歌《花蕾》唱出女性自強共鳴，希望各位女士可以茁壯成長。自小熱愛音樂的她說：「心情非常之興奮，因為由細到大都有參加歌唱比賽，好鍾意唱歌，今次覺得係代表作。」
錄音緊張
她自覺新歌表現只值70分，仍有很多進步空間。錄音前，她約朋友唱卡拉OK開聲，但效果未如理想：「無論係唱歌技巧、聲線同埋感情，我覺得可以再做好啲。第一次錄音好緊張，之前特登約朋友唱K，諗住可以開把聲，點知到咗閂埋門、戴耳機嘅時候，有一種莫名嘅緊張感。」