蕭正楠孭到斷氣 陳瀅尷尬：我唔輕！
藝人蕭正楠日前在中環街頭拍攝新劇，期間更要孭住陳瀅行斜路，由於女方並非纖瘦型，阿蕭明顯索氣兼滿頭大汗，令陳瀅有點尷尬。不過阿蕭識做地賴天氣熱，仲擺老友上枱，讚陳瀅輕過曹永廉！
阿蕭日前與陳瀅為《愛美麗狂想曲》拍外景，劇情講述他孭着陳瀅行斜路，然後陳瀅表白，阿蕭即激動地攬着她！拍攝前，阿蕭扶着欄杆似做熱身運動，由於天氣炎熱加上身穿冬天戲服，來回幾次，阿蕭已滿頭大汗！問到孭陳瀅是否很辛苦？他識做地說：「唔辛苦，係好奇妙同開心嘅感覺，見我個樣辛苦，只係因為天氣熱。（唔重？）咁佢有佢哋體重，但至少輕過阿廉（曹永廉）。」又自爆角色姿整：「頭髮前面個啄好重要，係角色嘅標誌，不過好易亂，拍每個鏡頭前都要照鏡整吓。」
親熱戲唔使備案
談及與陳瀅演情侶，阿蕭表示二人曾在《黃金有罪》合作，但甚少對手戲：「同佢合作，覺得個人都年輕咗。（多唔多親熱鏡頭？）暫時未有，我同阿廉之前就錫咗。（同陳瀅拍親熱戲，使唔使同太太黃翠如備案？）唔使，阿廉都錫得，仲有咩唔可以！」又指翠如由澳洲拍畢旅遊節目返港一星期，仍未有機會撐枱腳：「惟有買定多啲糧食同煮多啲嘢放喺雪櫃，等佢自己叮番熱嚟食，真係要提佢先會食嘢。（翠如病好未？）已經好番，因為嗰邊天氣凍，返到香港咁熱就冇事。」
唔介意剷青拍劇
至於陳瀅坦言拍攝前也有點不好意思：「因為我唔係輕，仲要行斜路。」講到親熱鏡頭，她表示不算多：「因為我哋段感情唔係好刻骨銘心嗰種，比較搞笑啲，劇中佢係好女人嘅男人，我係好男人嘅女人，我哋之後會有結婚戲。」又透露拍攝以來沒放過一天假，拍畢後又要開新劇，更聽聞要剷青！問會否介意？她說：「演員乜都要試，頭髮啫！剪咗可以生過，又唔係割咗我忽肉！」