盧宛茵受辱嗌劈炮為養家焗扮夫妻

盧宛茵開騷獲家人及好友宣萱、麥長青、陳偉琪、黃智賢、鄭敬基夫婦等捧場，至於未能抽空出席的星級「兒子」苗僑偉、古天樂、郭晉安、陳展鵬等則拍片祝賀。盧宛茵大玩百變造型，先後徐小鳳及美國天后Lady GaGa「上身」，大騷舞技！

席間講到娛圈血淚史，她自爆曾被男藝人奚落及侮辱：「覺得畀人白眼，喺某套劇佢做我老公，拍完導演都收貨，但呢個人話我冇表情、反應，唔知做緊乜！全場靜晒，個FM口震震問我補唔補Shot，我就行出去打畀監製話唔拍，但佢叫我繼續拍。」隨即有觀眾叫她開名，惟她婉拒：「唔得！我唔想樹敵，但我又諗，如果我係汪明荃，佢會唔會咁對我呢？」

離婚愧對子女

演出尾段，她深情剖白講家庭，但未講先灑淚：「我有過一段失敗嘅婚姻，離婚後要自食其力，又要負擔生活費，膊頭千斤重，覺得多年嚟都對仔女唔住，要佢哋喺破碎家庭長大，知佢哋童年唔開心，我一直耿耿於懷，欠咗佢哋，但依家我兒孫滿堂，佢哋應該原諒咗我。」隨即唱出《心債》，之後獲子孫、親友上台獻花，場面溫馨。

騷後她被追問當年被誰侮辱？她只說：「之後冇再遇過同合作。（當時委屈到喊？）冇。（繼續拍係因為要養家？）都係。」而有份演出的譚嘉荃於慶功宴期間獲送生日蛋糕慶祝牛一，令她很感動。