傅嘉莉溝仔講靈性寫詩有分加
藝人傅嘉莉（Kelly）於無綫熱播劇《包青天再起風雲》中，與張振朗、張頴康及歐瑞偉均有感情線。現實中她亦曾有兩男熱烈追求的經驗，她說：「讀書時，試過同一時間有兩個男仔追，佢哋本身係好朋友，我哋成日一齊玩，之後收到佢哋各自嘅示愛短訊，但我當時讀緊書，冇諗住拍拖，都係覺得做朋友開心啲。」
三年後結婚生B
問到現在是否渴望愛情？她說：「我冇抗拒識新朋友，都希望Mr.Right出現。（到時閃婚？）我一路目標想事業有成先結婚生小朋友，驚依家生兼顧唔到，希望過兩、三年，事業再衝刺。」
Kelly劇中飾演湯曉晨一角，網民大讚靚女還作詩給她，她開心說：「好開心佢哋咁投入，對住曉晨寫咗詩。（有冇男仔為你作詩？）都有人Send啲好Sweet嘅語句，好有Feel。（寫詩追你會加分？）會加分，我會鍾意靈性上嘅溝通。」
打中氣門痛到喊
首次做打女的她，拍攝前特別上堂學習摔跤，她自言打到周身傷，更試過被打中氣門，痛到忍不住流淚：「試過有場打戲太投人，對手冇留力打中氣門，第一次被打到抖唔到氣，好驚，未試過呢個感覺，一熄鏡頭就喊咗出嚟，我唔係嬲對手，係身體反應，因為又驚又痛。又試過被打到眼眶瘀咗好痛，不過就算辛苦，出嚟效果靚，就乜都值得。」
場地：南瀛水產