李泳漢爆大仔失控呷細女醋
藝人李家鼎大仔李泳漢去年兩年抱兩，育有大仔Alfie及細女Charlotte，湊夠一個「好」字！他大爆原來當初從醫院接Charlotte回家時，Alfie一度呷醋失控大叫，直至相處下來才能接受「哥哥」的身份。而打算讓子女自由發展的他，投訴弟弟李泳豪「教壞」大仔，打亂其如意算盤。
李泳漢為了一對子女，即使要24小時On Call，兼顧家庭及餐廳生意也絕無怨言，絕對是「廿四孝爸爸」！不論工作多辛勞，他亦堅決不會向小朋友發脾氣：「鼎爺（李家鼎）以前係會打仔嘅，但我自己湊小朋友嗰套好唔同，我絕對唔會惡，反而會用心去聽、去留意佢，因為細路仔唔識表達，所以我會畀更多耐性觀察佢。而當佢做錯嘅時候，我就會用嚴肅嘅態度，解釋畀佢聽咁做係唔啱。」
泳豪教姪仔玩車
講到對子女的期望，他笑言本來想讓大仔Alfie自由發展，豈料弟弟李泳豪「捷足先登」教Alfie玩車：「好快豪仔已經寵到佢鍾意玩車車，依家全屋都係車，試過行街見到車展，佢興奮到不停嗌Car Car，真係唔知好嬲定好笑！」
談及一對子女的相處，他指Alfie曾經呷醋，但很快便開始愛錫妹妹：「佢第一次見到妹妹好妒忌，喺度不停咁嗌，但我哋示範畀佢睇點錫妹妹，等佢哋相處多陣，好快佢就已經有樣學樣，跟我哋錫妹妹，依家仲會學我哋咁幫妹妹掃風。」
育兒貼士
1.有耐性，切勿對小朋友發脾氣，若然情緒不好時，應先稍作冷靜。
2.不建議使用暴力，小朋友頑皮時可以嚴肅態度處理，認真解釋箇中道理。
3.多作陪伴，讓子女在充滿關懷和愛護的環境下成長。