將於下月8日再度來港開騷的英國著名搖滾樂隊The 1975，剛於周三到杜拜舉行世界巡唱，期間同志主音Matt Healy突然落台與男Fans激咀。由於同性戀於當地屬違法，立即惹來網民批評他「靠害」！
現年30歲的Matt咀完男Fans後，隨即上番舞台並向對方示愛：「我愛你，兄弟。我哋全都係人類，係咪？如果你係Gay，我愛你，而上帝亦好X愛你。」咀仔片段亦於網上瘋傳。由於同性戀在阿聯酋屬違法，同志若於公眾場合咀嘴，一經定罪最高刑罰是入獄10年，過往亦有多宗外籍人士因不恰當行為而被判監的案件。不過目前為止，當地政府尚未回應事件。
事後，Matt於社交網留言表示沒有後悔這樣做：「由於我嘅『行為』，我知道我哋唔會獲准再回來，但我知道我愛你！如果再有機會，我一樣會咁做。」查實樂隊向來出名支持性小眾權益，去年Matt於倫敦投資一所新性小眾社區中心。不過，很多網民似乎不太接受其「偷吻」行為，更有人指他靠害：「Matt明知同性戀行為喺阿聯酋係犯法都去咀嗰位男Fans，咁做會令對方有危險！」
至於樂隊昨日已飛抵日本千葉，為Summer Sonic音樂節演出，Matt的演員父親Tim Healy亦於社交網留言為兒子報平安：「我同Matt傾過，佢依家冇事。佢試圖喺一個同性戀非法的國家支持同性戀權益。我同佢保證佢做得啱，我為佢而感到驕傲。」
四人組合The 1975於2002年成立，多年來深受樂迷歡迎，名曲《Sex》、《Chocolate》與《Robbers》先後成為英國流行榜冠軍，今年更於英國音樂大獎（Brit Awards）中大放異彩，勇奪年度英國大碟及英國樂隊兩大獎，曾獲邀來港演出大型音樂節Clockenflap。