「長青樹」喺呢行撈咗好多年，做過兒童節目嘅佢，深受大人細路歡迎，形象夠晒入屋，鏡頭前嘅佢笑到四萬咁口，但其實私下為人寸嘴又冇禮貌。當佢與其他藝人一齊做訪問時就好哋哋，但單獨一個時就現真章，好多記者都知佢麻煩，問一句答一句，有次佢出活動，臨訪問前寸寸貢問記者：「有咩要問？」答得簡短之餘，又乘機寸番記者，搞到記者火都嚟，冇心機問落去！
其實佢啲衰嘢都唔只一次，有次有個新記者唔小心踩中地雷，問佢一直避談嘅男友，搞到佢即刻起晒弶，態度惡劣，在台上時主持人提到結婚話題，有傳已經結咗婚嘅佢更「勵」住主持人，好有火藥味！
