古天樂舞爆紅館為祖兒獻第一次

天后容祖兒《PRETTY CRAZY JOEY YUNG CONCERT TOUR》演唱會前晚第11場請來好友古天樂擔任嘉賓，她以「全港都鍾意、顛倒眾生的男神」來介紹古仔出場，更跳起古仔的經典作《今期流行》的「拜神舞」，歌曲隨即響起，身穿粉紅色西裝的古仔登場，全場尖叫不停，他亦high爆邊唱邊跟觀眾握手。

集郵「溝掂」男神

古仔透露是帶病上陣：「我係病緊！」再自爆從未現場唱過《今》曲，祖兒即笑爆：「你真係好錫我，你係咪前世欠咗我o架？記唔記得你好多年前做過我演唱會嘉賓？」古仔笑罵：「你真係當我老人癡呆症喎！以前同你影過張相嘛！」祖兒說：「係，嗰時你仲拍緊劇，我喺電視台撞到你，當然係唔會放過機會啦，就係呢張相溝掂你！我講笑咋，你嗰陣好白，不過依家都唔係好黑。」二人妙語如珠，令觀眾捧腹大笑。

「火滾」唱多次

古仔在台上突然話要「安歌」：「唔知點解，我有啲谷鬼氣，都話唔好戴耳機，聽唔到現場聲音呀！我想唱多次！火滾！」見到祖兒一臉愕然，他說：「你驚overrun？你係咪都加咗場啦！」她即笑說：「呢個人真係好鍾意唱歌！」二人再起音樂「安歌」，古仔更投入跳舞。

唱畢後，祖兒細心幫古仔抹汗，情緒高漲的他不忘幫觀眾謀福利，表示要加插影相環節，祖兒笑說：「古天樂個人好好，雖然外表好似好惡，但佢內心好善良。」最終古仔選了三名幸運觀眾上台合照。當他準備走人時，卻被祖兒拉着不放，要他再獻唱，最後二人合唱《男朋友》。