陳家樂遭女神夾擊硬軚變關公！

陳家樂、張振朗、劉穎鏇及張曦雯等，早前分別到韓國、西班牙、斐濟、南非及希臘拍攝節目《12個夏天》，昨日的記者會上，家樂與劉穎鏇及張曦雯合照時突然相當怕醜，「硬軚」兼企到離行離列，面都紅埋，十分搞笑！他受訪時笑說：「因為同佢哋未合作過，有啲尷尬，我又比較慢熱，所以同連詩雅去韓國拍節目都擔心，好彩我哋年紀差唔多，有共同話題，唔會有代溝。」

被導演Cut戲

家樂笑言與連詩雅名副其實「開心到嘔」，他笑說：「有日出海拍嘢，唔夠5分鐘連詩雅已經暈船浪係咁嘔，其實我唔易嘔，但係見到佢咁，連我都嘔埋一份，佢哋話係蝴蝶效應喎！拍拍吓都衝去船尾嘔，仲有啲血添，最後導演要Cut咗呢部分，後來去浮潛太大浪，又再嘔過！」

連詩雅一出海就喪嘔，搞到家樂受「感染」。	張曦雯踢爆羅天宇到南非睇動物時，驚到躲在她身後。	張振朗與謝東閔搞乜咁HeHe？

羅天宇被嘲細膽

至於張曦雯與劉穎鏇談及搞到家樂「硬晒軚」，笑言可能她們太高。曦雯透露此行與羅天宇到南非近距離接觸野生動物，踢爆羅天宇冇乜膽，躲在她身後：「佢少少細膽啦！我又大膽啲嘅，樣樣都想試，我覺得女仔唔可以輸蝕，要大膽過男仔。」問到可擔心嚇怕追求者？她說：「嚇親就唔該企埋一邊，相信我鍾意嘅男仔唔會係咁。」

而劉穎鏇表示與張振朗及謝東閔到西班牙拍攝變成「妹仔」，她笑說：「佢哋真係好Friend好有默契，我好似阻住佢哋咁，成日都跟喺後面，仲陪佢哋去沙灘𥄫女添！」