美國男模特兒Josh Kloss日前於社交網，自爆曾被樂壇天后Katy Perry性騷擾，當眾除掉其褲子，令他在派對中露體，萬分尷尬！
Josh曾於Katy 2010年的MV《Teenage Dream》中演其男友，並有火辣床戲。他指當時Katy與前夫布蘭德（Russell Brand）離婚七個月：「件事發生在Johnny Wyjek（Katy造型師）嘅生日派對上。當我見到佢（Katy），我哋有擁抱，佢仍然係我暗戀嘅對象，但當我轉身向朋友介紹佢時，佢就拉低咗我條運動褲及內褲，佢嘅朋友同其他人都見到我嘅陰莖，你想像到我當時有多尷尬嗎？」
Josh解釋直至現時才爆料，是因覺得#MeToo運動只關注女性受害者，所以他認為有必要在MV推出的周年紀念日挺身而出，為自己發聲，並強調有權力的女性同樣令人惡心。
Katy暫時未回應指控，不過其朋友就力斥Josh講大話老屈！而當日生日的Johnny，亦在社交網留言反擊：「我唔會畀你對我朋友作出咁嘅指控，呢個簡直係廢話！Katy從來唔會做啲咁嘅嘢，我哋都知自拍MV起你一直都對佢（Katy）着迷。」而Josh回應事發時有很多人在場，更叫Johnny先問清楚Katy有冇做過！
除此之外，他亦自爆當年拍MV的薪酬僅得650美元（約5,070港元），自覺被Katy利用，首日開工後，Katy邀請他去脫衣舞店，但他以返酒店休息為由婉拒。
其實今次已非Katy首次因對男性有不恰當行為而捱轟，去年她於歌唱真人騷比賽《一夜成名》（American Idol）任評判時，偷咀19歲少男參賽者Ben Isaac Glaze，即被大批網民批評她有性騷擾之嫌。此外，Katy亦曾被傳在未經同意下，於紅地氈上揸拉丁樂壇小鮮肉Shawn Mendes的屁股而惹來批評！