嫁「地貧」C君 Mon實健康 黃天頤：想佢遲過我死！
組合農夫成員C君（鄭詩君），今年2月宣布向拍拖四年的電台DJ黃天頤求婚成功，將於今年底結婚，天頤分享二人愛情故事，指2006年同在廣播道上班而結緣，但拍拖初期亦有猶豫：「做得好朋友，諗拍拖就賭上十年嘅友誼，一係得、一係冇咗個朋友，但係佢話有信心同我行落去。過咗頭半年，我已經冇咗不安嘅感覺。」C君於拍拖期間寫過一本情書給她，令她十分感動：「佢送咗本日記畀我，其中一日佢話終於忍唔住同陸永講我哋拍拖，因為佢覺得呢個世界最會由心裏面祝福我哋嘅人就係陸永。」
仲未影結婚相
她自爆籌備婚事進度緩慢，結婚相都未影，但笑指C君的高度參與，連她亦估計不到：「佢嘅投入程度比我想像中高，例如我搵咗啲資料，佢真係睇晒，之前去試婚紗同睇場地，佢都好願意陪我，有時覺得啲服裝好誇張，佢就會講『試吓啦！一世人一次喎！』佢覺得唔煩，反而好好玩。」
講到C君自小患有地中海貧血症，更有傳其前度Gloria因此悔婚兼提出分手，黃天頤說：「我唔係冇擔心過，生老病死唔能夠控制，我只係諗呢個人會唔會好快離開我，咁人係貪心嘅，一定想另一半遲死過你，所以我都不時提醒佢要愛護身體，因為佢食嘢好重口味。」講到生育問題，她坦言順其自然，更已做好身體檢查：「佢都唔抗拒生，我哋前提唔係因為想生小朋友而去檢查，呢個只係對另一半基本嘅尊重同負責任。」
場地：Victorian Rose Tea Room