劉佩玥榮幸合作 錢嘉樂：佢好聽年輕人意見
夏萍最後演出作品，是與陳展鵬等合作的無綫劇《城寨英雄》，有份拍攝的劉佩玥得知夏萍死訊大表惋惜：「好榮幸同佢合作，佢好可愛，記得有日開廠連續拍好幾場，佢仲好精靈同劇組有講有笑。」
曹永廉讚記性好
1995年與夏萍合作電影《烈火戰車》的錢嘉樂說：「我喺洪家班工作時已認識夏萍姐，之後同佢拍《烈火戰車》同劇集《烈火雄心》，我哋好有緣。佢對演藝界嘅貢獻可以話係一生嘅，佢好聽年輕人意見，明白演戲係群體工作，佢好配合大家。」而曾與夏萍多次合作拍劇的曹永廉說：「年前我同佢、吳啟華合作《純熟意外》，當時佢已經唔係好睇到劇本，不過只要讀一次對白畀佢聽，佢已經記到同做到，同佢合作好開心，係一個好爽嘅人。」
至於胡楓1953年已認識夏萍，相交超過半世紀，他說：「梗係唔開心，知佢病咗好耐，但自從佢入老人院，大家少咗聯絡，我都唔知應該去邊度探佢。同佢拍戲好好玩，佢係男仔頭，講笑乜都得，會送佢最後一程。」而薛家燕與夏萍同樣結緣於粵語片年代：「知道佢去年跌親後，身體開始唔係幾好。佢記性好好，演得又好，好多時我哋安排佢坐低演戲，晚上10點左右會放佢走。」