飛腳踢麥浚龍謝安琪自傷胸骨
繼《羅生門》後相隔4年，麥浚龍（Juno）及謝安琪（Kay）終推出全新合唱歌《廢話》，為拒絕製作「《羅生門》2.0」，Juno特意採用不同班底創作，並再次打破廣東歌合唱模式，破格地一人一字對唱。新歌繼續說故事，延續浦銘心（由Kay飾演）及董折（Juno飾演）的內心世界，MV透過抽象現代舞步融入武術呈現，加上雨中剪影等視覺效果，不惜工本。
爆燈膽閃火花
今次拍攝加入大量武打戲，Kay自爆早於兩個月前排練，鍛煉肌肉的耐力，但她臨埋位一刻，仍然沒足夠信心︰「有幕我要一腳踢走Juno個嘴叼住嗰支煙，武術指導當場做最後示範，亦都唔係一試就成功，搞到我更加緊張。」幸最後順利完成，效果亦相當有驚喜︰「其中一個Take，連燈膽都畀我哋丟爛，突然閃出火花，呢個真係意料之外，當下都擔心會唔會整傷Juno，好彩冇事。」
身兼導演的Juno則大讚Kay表現專業，並大爆對方唔錫身︰「今次啲動作場面，佢準備咗好耐，對於冇習武嘅人嚟講係需要勇氣，佢好投入，整傷胸骨都唔知，顯示出佢嘅勇氣同專業，好感謝佢咁信任。」
