陳松伶巡演靠老公鬆骨

久未開騷的松松計劃舉行世界巡唱，又有排忙喇！

松松昨日以神秘嘉賓身份現身音樂發布會，宣布加盟新唱片公司，並宣布一系列音樂大計，包括世界巡迴演唱會。已闊別香港4個月的她，剛完成舞台劇上海站，但留港3日又要赴蘇州演出。

最耐兩個月冇見

對於舞台劇巡迴歷時3年，可有時間舉行個唱？她笑說：「要攝時間，我要Keep住繼續運行，一日一場身體好。（冇時間陪老公？）佢嚟陪我，上海佢幫我打點，大家減少距離，試過兩個月冇見，但唔會再咁樣。（老公投訴？）唔係咁健康，問過好多結咗婚嘅Couple，都話唔可以太耐唔見，好在我哋都願意為對方做阿四。」她坦言會為老公煲湯，而老公則為她按摩，甜蜜一刻更曾被粉絲攝入鏡頭，她說：「佢幫我按摩隻腳，加分！」松松被喻為「兒歌天后」及「小調天后」，問是否回歸樂壇？她直言想於唔賺錢的情況下做音樂。

同場的石詠莉身穿露背裝獻唱，並表示一直很喜歡松松，希望有機會合作。談及新專輯面世，她笑指老公鄧健泓也有攞意頭買一隻支持：「其實做音樂好窮，唔係大家諗得咁富裕o架咋！」

松松收花慶祝加盟新唱片公司。

石詠莉自薦做松松的巡唱嘉賓。