李幸倪澳洲度生日唔預男友？
歌手李幸倪（Gin Lee）昨日出席視聽展，並首次公開獻唱新歌《浮世繪》，她說：「有少少緊張，因為歌詞有60首歌歌名，都幾難記。」講到8月26日的32歲生日，她透露會與家人旅行：「我下星期會去星馬宣傳，所以會join埋馬來西亞嘅屋企人一齊去澳洲玩，好耐冇放假。（男友同行？）呢個係Family Trip。」問到男友在她生日有何表示？她避談：「冇嘢表示，其實每年都想同屋企人最少去一次旅行。（男友冇得去會唔會嬲？）如果我冇得去我就會嬲，哈哈。」
Robynn仲未慣叫「老公」
同場還有Robynn & Kendy，其中8月30日33歲生日的Robynn表示，仍未計劃如何慶祝，但與老公的生日只差兩天，所以自己亦十分頭痛買甚麼禮物，Kendy則笑說：「你哋可以一人買一邊Hifi喇叭畀對方，變相半價咗。」Robynn即說：「都好，逼佢聽我哋啲歌，或者買部相機畀佢，叫佢影多啲我哋嘅相。」今年初新婚的她表示，婚後最不習慣叫「老公」，笑言會毛管戙。
