李思欣未想生B分享「生蛇」
藝人李思欣昨日到電台受訪時分享健康心得，但笑言自己不太注重健康：「我好為食，鍾意食油膩、煎炸嘢，呢啲係高危嘢。」她同時分享曾經生蛇的經歷：「我唔覺得係中招，有兩粒類似暗瘡嘅嘢喺條腰，覺得痕，以為係蚊癩，但後尾覺得痛，所以睇醫生，醫生話好彩我睇得早，其實係生蛇，佢畀藥我食撳住，好彩冇擴散到，要忍手唔可以𢱑。」
問到可有叫老公范振鋒注重健康？她說：「佢仲注重過我，佢成日飲水，我就成日飲凍嘢，但其實女仔飲凍嘢唔好。（有冇調理身體準備生BB？）我間唔中都有睇中醫調理身體，但生BB就遲啲先。」