歌手鄭欣宜前晚出席網上直播音樂節目，透露新歌《救命歌》是今年唯一一首歌：「做吓其他嘢，之前都有拍戲、拍劇，遲啲會陸續推出，多方面發展。」她亦希望有機會與其他歌手合作開騷：「我有諗過同大家估唔到嘅人合作，會特別啲，同唔同年代嘅歌手開個小型Crossover，我都有幾個人選，如果可以同家燕媽媽（薛家燕）開騷會好開心，佢之前都請過我做紅館演唱會嘉賓。」
