陳奐仁「聽」不出聲照開騷

音樂人陳奐仁（Hanjin）昨日現身聽障分享會，自言天生有聽障，左耳及右耳分別只有七成及五成聽力：「去飲茶嘅話，環境太嘈，我連隔籬嘅人講嘢都聽唔到，同埋會耳水不平衡，好易暈車浪，所以注定做唔到有錢人，唔可以住山頂。喺舞台表演，我好難聽到自己把聲同結他聲，台下觀眾有時會同你講嘢，我都聽唔到。」雖然如此，但Hanjin從未放棄音樂夢，更將於本月底舉行演唱會，現正忙於練習韓風舞步。