許廷鏗恨做老竇搵機會播種

許廷鏗笑言被「小公主」冧暈，有意生B。

Alfred聯同衛詩（Jill）、曾若華、洪嘉豪和黃劍文，昨日出席Mira Place中庭舉行的「樂在當夏Gimme LiVe音樂節」。Alfred近日家中添喜事，家姐再誕下一名「小公主」，他開心報喜：「係呀，我又做舅父，今次抱B熟手好多，而兩歲嘅姐姐已經識呷醋。」

擇偶條件合眼緣

問到可有生B衝動？他直認恨做老竇：「我真係想o架，我張抱B相，有啲出面嘅Fans以為我做老竇，其實點會無啦啦做老竇呢？冇人會信啦。（張致恒個BB都係等到百日宴先講畀大家知？）我會乖乖哋，一定公開、公正話畀大家知嘅。（咁你『播種』未？）冇對象，希望今年流年好啲，搵到個啦。」正所謂播種都要有塊田，問到他有何擇偶條件？他抵死笑言：「唔使大，啱眼緣就得啦。」

衛詩非洲探孤兒

至於Jill早前到非洲探訪兩星期，帶了糖果、文具及玩具給當地孤兒作禮物。剛回港的她，坦言有點不捨：「去咗盧旺達同烏干達，識咗好多朋友，好正。」雖然當地小朋友的居住環境不好，卻很堅強地生活，令Jill充滿靈感，打算回來寫福音歌。問到下次會否與家姐衛蘭一同往探訪？她說：「會呀，因為家姐要做新碟錄音，所以今次去唔到。」

許廷鏗與粉絲近距離互動Jam歌。

衛詩指非洲之行獲益良多，望創作更多福音歌。