陳家樂為妹妹辦嫁妝

家樂身穿藍色西裝以「最帥Sales」現身西九龍V Walk為英皇珠寶店擔任「明星店長」吸客，面對琳琅滿目的鑽飾及金器，他乘機為胞妹做準備：「我有特別任務，就係幫妹妹買龍鳳鈪，佢上年註咗冊結婚，今年10月先擺酒。」家樂從未買過龍鳳鈪，妹妹亦信唔過其眼光，故稍後會親自到珠寶店「幫眼」，問到預多少錢買金飾，他笑言：「希望阿妹高抬貴手啦。（叫公司喺人工度扣數？）又扣？真係要努力工作先得！」

唔介意被爬頭

談及妹妹「爬頭」結婚，他直言毫不介意：「爬咗好耐頭啦，可能想生小朋友。（係咪雙喜臨門？）唔係，但可能係我都唔知。」問他何時有好消息？他說：「盡力啦，努力工作先，阿爸阿媽要抱孫就交畀阿妹。」

跳舞似大閘蟹

對於同門的關智斌（Kenny）前日宣布紅館演唱會「失而復得」，飛起「負皮王」張致恒單飛開騷，家樂直言替相識十年的Kenny開心，有信心好友個唱必一票難求，屆時他會捧場打氣。問可會上台任嘉賓？他謙虛的說：「冇呢個能力，無謂要我跳舞唱歌啦，我跳舞係零天分，當年SUN BOY'Z重組時，成員有陳偉霆、麥子豪同我，但我上咗三、四次跳舞堂後都放棄，公司都放棄。」更自嘲因手腳不靈活，以前跳舞似螃蟹，現進化到變大閘蟹。