石詠莉獨自錄音有「人」和唱

石詠莉、王馨平及張偉文等，前晚在電視城錄影節目《流行經典50年》。石詠莉透露第五張個人大碟即將面世，滿心期待，當中翻唱了鄭少秋《輪流轉》及麥潔文《夜夜痴纏》等，首首經典！

外傳每當播放《夜》歌都有怪事發生，石詠莉坦言在錄音室亦遇上不可思議事件：「到時你哋聽吓咪知囉！（係咪有怪聲？）係好聽嘅聲音，好似和音咁。我又唔係好驚，前輩話係隻歌好聽，『佢哋』先會留低！」並指後期製作時才發現「和音」：「Mixing先發現多咗把聲，但錄音時只得我一個喺錄音室。（外傳呢隻歌成日有怪事發生。）之前真係唔知道，我亦唔迷信囉！」

王馨平港台兩邊飛

至於王馨平提及父親王羽獲頒金馬獎「終身成就獎」，她說：「爸爸好開心，因為金馬獎係華人地區好重要嘅電影頒獎禮。（佢會親身領獎？）我會同妹妹、大會商量吓點安排，況且爸爸貪靚，唔係最好嘅形象就唔想見人，我同妹妹要保護佢嘅英雄形象。（佢知唔知導演王晶批評佢？）唔知，因為佢唔睇社交網，不過對方已經刪除咗。」並指父親近日心情不錯，一直留在醫院由醫療團隊照顧，自己則每月抽時間飛台北探望。

張偉文盼站起來

「靚聲王」張偉文坐輪椅亮相，表示要定期去醫院覆診，刻下左腳無力：「其實我可以企番起身嘅，不過要畀時間囉，希望九月喺伊館開騷時能夠畀觀眾驚喜，起碼企一企起身謝幕同鞠躬。」

擔任主持的譚嘉儀低胸省靚招牌。

胡楓全程傍實張偉文。