徐綺雯公私兩忙拍拖要度期

被讚靚咗又Fit咗的徐綺雯，擺甫士格外自信。

早前承認結束7年婚姻的徐綺雯（Candy），不但繼續模特兒事業、律師樓工作及珠寶生意，最近更投資美容院。她有感時下美容院提供的療程收費過貴：「我嘅概念係收費合理啲，應使得使，幫多啲客人變靚。我哋冇人斟茶、冇靚裝修，情願投資落機器或請專業嘅人手，收費相對平啲。」

身材唔使「大」

Candy更體驗生酮減肥、無針埋線等療程，親自做生招牌，她說：「之前因為公幹或者朋友聚會，要去意大利、日本、希臘，順道影咗啲靚相，好多朋友話我靚咗、瘦咗、精神咗，仲講笑叫我出寫真。出寫真我冇興趣，反而鍾意同人分享健康之道，健康美好緊要，唔係話某個部分大就係靚，均勻先係關鍵。」

唔強求緣分

至於感情生活有否着落，她笑說：「我要拍廣告、返律師樓、搞生意兼周圍飛，又要抽時間做運動，每日時間排到密麻麻，要追我嘅話，真係要睇吓我個時間表先，哈！女人唔一定有拖拍先至叫做幸褔開心，識得錫自己、自我增值、有自信同健康先至矜貴。緣分唔使強求，真命天子要嚟，點擋都擋唔住！」

為公為私都不停飛，徐綺雯把握機會影靚相。

徐綺雯做「白老鼠」，親自為美容院做生招牌。