任達華復原快等做物理治療

藝人任達華在中山遇襲被刺傷腹部及割傷右手四隻手指，昨日被問到復原情況時表示：「復原得好快，謝謝關心！」並指今次經歷令他更明白，家人、朋友的支持與陪伴永遠最重要！被割傷的四隻手指估計幾日後拆線，之後開始做物理治療。

感受盲人的內心世界

他主演的電影《小Q》8月中在港推出，內地則延至9月20日上映，受傷前任達華不停為影片宣傳做訪問，他表示在片中扮演盲人，與導盲犬「布丁」成為好拍檔大演對手戲，為了投入角色，他戴上特製的隱形眼鏡，感覺並不好受：「睇嘅嘢變成全白，外來光線令我覺得好刺眼、好辛苦。」為了體驗盲人的內心世界，他到盲人學校接受訓練，試過蒙着眼逗留在全黑空間：「感覺好無助，自己嘅方向感全部冇晒，唔知去咗邊！」

當中一場戲講述他因討厭「布丁」，引牠行近，然後發脾氣大力拉扯牠，令不少愛狗之人為之不忍，任達華直認拍到好心痛：「但呢個係劇情需要，『布丁』好黐我，當初為咗接近佢，訓練時我學識扮狗叫，盡量用狗嘅語言同佢溝通，最搞笑嘅係拍戲期間佢成日要錫我，但好多時都錫錯位，搞到我成面口水，最終我要搽少少芝士喺啱嘅位置引佢錫落嚟，先完成拍攝。」

在家中靜養的任達華，復原情況理想。

任達華受傷前接受訪問，直認與「布丁」培養出感情，希望將來收養牠。

有意收養「布丁」

此外，他要在鬧市「玩自殺」，道具汽車在他身前急停，令人睇到一額汗，他說：「因為睇唔到位，我要靠個腦記低自己嘅『表演區』，我同自己講要行啱方位，記住行去10點方向。（成日跌親？）手手腳腳少不免擦損。」他又指「布丁」也付出很多，希望牠能夠提名金像獎「最佳女主角」及「最佳新人」：「拍完戲後佢返去服務主人，但我同佢好有緣，喺做Gym嘅地方有好多人幫襯佢主人做盲人按摩，所以我有離遠探過佢，希望8年後佢退休，我可以爭取到收養佢，大家再續未了緣！」