何廣沛挑機陳豪爭女爆喊敗走

無綫新劇《愛美麗狂想曲》日前於銅鑼灣取景，吸引大批上班族和遊客圍觀，不少OL見到陳豪都為之瘋狂。老婆仔女飛往加拿大放暑假，剩下他一支公開工，坦言掛心，不過，他有定下時間表與太太和兒女培養感情，難怪「暖男」成為不少女士的偶像，就連劇中演富二代的何廣沛，面對他都要投降！

樂於接受姊弟戀

廣沛與佳芯於劇中發展「姊弟戀」，可惜Timing唔啱，最後含淚分手。廣沛指分手戲尚未拍，但已擔心屆時會爆喊：「其實呢場戲講我同佳芯已經貌合神離，而佳芯又剛同陳豪有啲Feel，要我同『暖男』拗手瓜，佢太勁啦，我知難而退。（分手爆喊？）導演想我含淚，要畫面好淒美，但到時我驚會爆喊！」

何廣沛面對強敵陳豪爭女，知難而退。	李佳芯與兩男有感情戲外，預告會有更多瘋狂演出。	陳豪與何廣沛、李佳芯街頭拍劇，吸引大批市民圍觀。

講到「姊弟戀」關係跟現實中31歲的他與32歲的緋聞女友朱晨麗一樣，大家相處卻未見問題，問是否接受「姊弟戀」？他帶笑扯開話題：「佳芯咁靚梗接受啦！（講緊朱晨麗呀？）哈哈……其實年紀差得少冇嘢嘅，十幾年就唔得啫！」他稱劇中演富二代用物質氹女友，問現實有否這樣氹朱晨麗？他笑言：「現實就梗係冇咁嘅能力啦。（齋氹呢？）個個都有氹啦！」

上天下海冇覺瞓

至於佳芯與兩男先後有感情線，她稱不止感情線豐富，更因劇種超乎現實，有不少上天下海的瘋狂情節，稍欠體力都難以應付：「好多幻想嘢，我仲要打怪獸，又要上天、下海乜都有，好激！（體力應付到？）開劇冇得瞓，抵抗力會差啲，會注意吓飲食，養生好重要！」