憑同志片《以你的名字呼喚我》（Call Me By Your Name）上位的32歲荷里活型男Armie Hammer，日前上載一條兩歲兒子喪吮他腳趾的片段，即時被網民狂插，直指其行為令人作嘔！
Armie於社交網公開老婆Elizabeth Chambers所拍的一條短片，片段中他的幼子Ford抱住父親的右腳腳趾不停吮，幾秒後躺在梳化上的Armie即縮番隻腳，然後對住鏡頭笑一笑。Elizabeth則說：「咁樣唔正常。」Armie亦在短片字幕寫上「呢個持續咗整整7分鐘」，又標籤「戀足癖」。
片段曝光後即惹來大批網民圍插，直指條片好惡心，更批評Armie任由兒子吮腳趾好有問題！有網民更嬲到爆粗：「Armie Hammer，你上載啲咁嘅嘢搞乜X呀？」亦有網民呼籲其他網友停止再轉載那條片。
之後Armie知衰即時將片段刪走，而Elizabeth則於社交網留言同老公「割席」，她說：「其實唔係7分鐘……只係5秒鐘。我哋個仔好鍾意玩人隻腳，我將片段放喺家庭頻道上，因為呢個係我哋之間長期嘅笑話。Armie將條片分享到Instagram絕對唔係明智之舉，但我可以保證我哋細路嘅安全同健康永遠係我哋首要考慮。」Armie與Elizabeth於2010年結婚，二人育有兩名子女分別是4歲女兒Harper及2歲兒子Ford。