陳潔玲忙到甩轆邊行邊吔包

陳潔玲一路講電話一路食包，好忙喎！

2012年港姐陳潔玲近年離開無綫轉戰影壇，但近月曝光減少，只偶爾在社交網派性感「福利圖」。據知，她忙於搞Party Room及美容產品生意，鋪路做商界女強人。最近她斥資6位數在觀塘區附近再開Party Room，雖然貴為老闆娘，但仍要一腳踢做埋打雜。

懶理男士目光

日前Christy被發現在觀塘街上游走處理事務，見她一邊傾電話一邊食麵包，忙到食晏都冇時間。當日天氣悶熱，她穿背心熱褲騷香肩及白滑長腿散熱，經常被男途人眼望望，但她未有理會。之後她到家品店掃貨，左顧右盼又踎低又趷高，俯身揀貨時不經意露事業線，最後買了幾條毛巾及地氈。

有意再拍劇

其後她到工廠區多間五金舖格價，由於五金舖出出入入都是粗獷男士，Christy可謂萬綠叢中一點紅，最後她買下光管離開，繼續返舖工作。事後她受訪時大呻忙到一頭煙：「雖然舖頭有請人，但我都親力親為，入面所有傢俬、廚具同裝飾都係我買，搬嘢換光管都係我做番，所以呢排好忙，唔辛苦邊得世界財。（唔再拍劇？）有啱嘅角色都會做，我依家自由身，可以嘗試唔同種類嘅工作。」

踎低揀家品。

買完光管，急急離開五金舖。