麥明詩甩Beat失威反面教材
港姐15位候選佳麗昨日在熊本拍跳舞片段，與熊本熊一起做早操，當中王菲、蔡嘉欣及姚羽嘉跳得似模似樣，廖倬竩則論論盡盡，高妹楊詠彤可能身形高大，跳起來有點生硬，但都不及師姐麥明詩「失威」，甩晒Beat要師妹教！
《2019香港小姐競選》在日本拍攝進入尾聲，師姐麥明詩和馮盈盈昨日與佳麗在當地一間小學操場拍跳舞環節，師姐竟被比下去，明詩因舞步不熟、論盡甩Beat，反過來請教師妹，認真失威。受訪時她自嘲「老了」跟不上：「嚟到玩創咗個心，要溫故知新練番好佢，今日冇跳得咁好，製作同事可以畀多幾個鏡頭啲女仔囉！」
馮盈盈被爆愛𥄫女
盈盈則自稱是「反面教材」：「我哋跳得唔夠佢哋好，咪可以凸顯佢哋好囉！」明詩即踢爆盈盈「𥄫女」：「你仲好欣賞一啲身材澎湃嘅佳麗，見人哋件衫濕添！」盈盈笑言：「其實係見到廖倬竩跳到成身汗，有透視效果，係健康嘅性感！」
至於王菲、蔡嘉欣及姚羽嘉齊齊受訪，曾習舞的姚羽嘉跳得最好，她直認舞步簡單當作練習：「我跳咗十幾年舞，大部分舞蹈都學過跳過，呢啲難度唔高。」蔡嘉欣即說：「一講跳舞就靠姚羽嘉教，佢係我哋跳舞大Boss！」
高妹楊詠彤手硬腳硬
至於高妹楊詠彤和廖倬竩表現差強人意，楊詠彤因高大和手硬腳硬影響表現，她笑言：「可能自己手腳太長，自細又冇跳舞，記得晒啲舞步，以為合格。其實讀書時期身高都係障礙，返學永遠企最後，影相都要就朋友。」廖倬竩跳得很搞笑，她說小時候有學芭蕾舞、Jazz及Hip Hop，但十幾歲因為扭傷腳沒有再學，當時還覺得自己跳得不錯。
特派記者陳永峯日本報道