吳綺莉閂卓林水喉想搵伴填補空虛

17歲當選亞姐冠軍後踏入娛樂圈、26歲未婚產女的Elaine，與18歲便宣布「出櫃」、19歲更與外籍女友Andi結婚的卓林，外間認為兩母女之「暴風歲月」同樣精彩。不過，Elaine認為女兒活得比她更激，對卓林的行為，作為母親的她其實是體諒的：「我同個女性格都好似，一樣咁硬頸，但我個女本質係乖，自己17歲選亞姐，乜都冇諗，以為請助手點知畀人提名去選亞姐，人哋賺咗筆幾萬蚊提名費，『被賣』都唔知，哈哈。（卓林離家出走、又同性結婚激過你？）佢激過我好多，但都係嗰句，經歷入面學到嘢，我個女都係20歲咋，除非要養成頭家嗰啲特別叻、好生性，否則由16到26歲冇乜家庭負擔嘅年輕人，一般唔知自己想點。」

溝通未有惡化

多年來是衝動派的Elaine，如今學會凡事放慢、放緩處理，跟卓林關係未有惡化，但問到與Andi的關係，她就未有多講，明顯未能接受這位「新抱」：「我嘅思想正面咗好多！（幫到你同女兒溝通？）不如咁講，唔會有惡化情形。（同個女傾乜？）冇o架，叫佢照顧好自己，唔好咁易受人影響，同埋要畀佢知我係愛佢嘅！（有冇畀錢佢使？）冇啦！向好方面諗啦，每個人都要有經歷，咪當係佢其中一個經歷啦！（有冇見面？）好耐冇見佢，只係社交平台或新聞先見佢。（接受Andi嗎？）除咗我隻貓同我個女，其他人我唔講啦，你話我自私乜都好啦！」

擇偶拒年紀細

女兒長大離家，Elaine可有想過拍拖填補空虛？她笑言：「呢樣嘢難過你搵工，我長時間一個人度過咁多家庭問題，都要啱先得嘅。（想搵個伴嗎？）從來冇話過唔想，但唔好為咗拍拖而拍拖。（有咩條件？）我5呎10，高度同我平頭都唔太難搵，但年紀細過我反而要諗吓！」

服裝：I.T

鞋：Giuseppe Zanotti

場地：Stadium