城城Like私人飛機 坐完想揸走
天王郭富城昨日到澳門出席奢華珍藏展覽，坐上飛機、名車、遊艇，體驗海陸空的超級珍藏品！他坐上私人訂製飛機出場，笑言「個心都卜卜跳」，更想揸走飛機！
郭富城昨日到澳門新濠天地出席TheArsenale首個亞洲珍品展覽「奢迷空間」活動，展品全是億萬富豪的超級玩具，包括飛機、車、遊艇等珍藏。戴上黑超的城城在私人訂製飛機上型爆登場，表示小時候夢想是做飛機師：「可惜冇做到，電影入面都未做過飛機師，頭先坐上呢架私人小型飛機個心都卜卜跳！」更笑言想揸走架飛機。之後他又坐上在電影《黑超特警組》出現過的防彈裝甲車，以及參觀電動遊艇。
細個收藏膠錶汽水蓋
城城坦言心儀該架私人小型飛機，笑言想將它擺去自己天台，問到飛機幾錢？他說：「唔知喎！但唔係想像中天文數字咁貴，不過做演員嘅好處就係可以透過角色感受自己嘅夢想。」講到他有收藏名車，他說：「用多年努力去買啲自己鍾意嘅嘢獎勵自己，如果唔係就係白活，我記得細個係收藏膠手錶同埋汽水蓋，但唔同階段就有能力買唔同嘢，記得出嚟做嘢開完香港第一個演唱會，就買咗第一架車，紀念開咗26場演唱會，當時架車成二百幾萬，依家仲喺度。」
問到現時收藏了幾多架車？他笑說：「唔講住，但希望可以開個慈善展覽將啲車展出，話畀未有夢想嘅朋友聽，想要希望得到嘅物件需要大量努力，我自己都要努力，依家未有能力買到頭先嗰啲展品，所以呢個將會成為人生推動力。」問到想幾時開展覽？他說：「睇Timing，暫時未係適當時候。」問到可有為囡囡收藏物品？他表示有金鈪、吊墜、平安鎖等，待囡囡大個會給她們。另外，講到他繼張學友後，成為新進「逃犯剋星」，他笑說：「睇到新聞好詫異，擘大個口唔識回應。」
特派記者林惠珊澳門報道