吳岱融傷風未愈潛水出事急送院

吳岱融日前與晨曦明星隊到沙巴進行足球友誼賽，完成賽事後，他與太太鍾淑慧、好友林韋辰留在當地度假。本月21日，他與林韋辰等潛水期間發生意外，情況相當危險！

頭痛欲裂兼嘔吐

吳岱融目前仍在沙巴，昨接受訪問時表示：「我冇為意自己傷風未好，原來鼻塞、傷風係唔可以潛水，但我仲去咗深潛，原本落水都冇問題，但落到深嘅地方就發覺唔妥，即刻同教練Jack做手勢話我唔舒服，要返番上水面，唔知係咪個過程可能快咗啲，升到大概廿幾呎左右，個頭就好似想爆炸，教練就即刻拉住我，之後再慢慢上番船度，成個過程我個頭痛到好似爆炸咁，亦好難呼吸，之後返到酒店房仲嘔咗3至4次，後尾林韋辰送我去醫院，可能係減壓過程出咗問題。」問到太太當時是否在場？他說：「佢冇去潛水，我去到醫院都唔敢即刻通知佢，等穩定咗、個頭冇咁痛先同佢講。」

稍後回港再檢查

原計劃明日或後日回港的吳岱融，因怕上機身體再出問題，暫未知實際回港日期，但返到香港亦會立即入院做檢查。雖然抱恙，但他仍不忘奉勸大家潛水務必注意安全：「有傷風感冒、心臟有問題都千祈唔好潛水，希望藉着自己經驗提醒大家，小心水上活動。今次係一次深刻嘅大教訓！」

吳岱融上水後，曾多次嘔吐兼頭痛，最終送院治理。

鍾淑慧經社交網尋回失散40多年的沙巴親戚。

今次沙巴之行，原來還順道探望太太在當地失散40多年的親戚，他表示：「佢喺Facebook搵番晒佢爸爸嘅親戚，佢爸爸係沙巴人，有11個兄弟姊妹，媽媽喺汶萊出世，之後佢父母去咗香港及大陸，所以同親戚失散咗。呢件事計劃咗好耐，咁啱晨曦話嚟踢波，我又拍完《大醬園》，所以就順便過嚟聚一聚。」

潛水教練楊正軍指，若潛水期間突然急速升上水面，會出現頭痛、惡心及嘔吐等常見症狀，未有引發「爆肺」亦僅屬好運，並強調超過45歲的人士有潛在的深潛風險，建議先獲醫生批准。他又指所謂的「上水掣」其實是浮力控制裝置（BCD） ：「主要控制浮力，其實體驗潛水者最好唔好掂BCD個掣，應該由貼身潛水教練負責控制。」